AGACA foi recoñecida co Premio Medio Ambiente Aproema 2025 na categoría de entidades privadas pola súa traxectoria e impulso en materia de sostibilidade no cooperativismo agroalimentario galego. Carlos Ares recolleu en representación de AGACA este galardón que foi entregado no marco do foro ‘Residuos e Empresa: retos, oportunidades e obrigas para unha Galicia máis circular’, organizado na cidade de Vigo
A organización destacou a AGACA como a entidade de referencia do cooperativismo agroalimentario en Galicia, actuando como unión de cooperativas e representando a profesionais da gandería e a agricultura de todo o territorio. O premio inscríbese na visión dun cooperativismo comprometido co territorio, coa calidade e coas persoas.
A traxectoria e o compromiso coa sostibilidade de AGACA de cara ao cooperativismo galego ven desenvolvéndose dende hai anos en diferentes liñas de traballo, entre elas, a redución da pegada de carbono e hídrica en explotacións de vacún, mellora do benestar animal, implantación de certificacións de calidade e ambientais e actuacións ligadas á redución de residuos e ao impulso da economía circular.
O xurado, conformado por representantes de Sogama, FEGAMP, Universidade de Santiago de Compostela e de Aproema, salientou o impacto notable sobre milleiros de persoas beneficiarias, o fortalecemento das cooperativas como estruturas máis profesionalizadas e resilientes, e o carácter referencial desta iniciativa para outras comunidades autónomas e países europeos. Tamén puxo en valor a súa contribución á orientación de políticas públicas vinculadas ao sector agrario e gandeiro.
