AGACA organiza un obradoiro presencial dirixido a persoas que forman parte, ou van formar parte, dos consellos reitores das cooperativas. A actividade celebrarase nas instalacións da Cooperativa Vitivinícola Arousana (Lg. Valdamor, 18, Xil, Meaño — Pontevedra) os días 1, 2, 22, 23, 29 e 30 de outubro, en horario de 18:00 a 22:00 h.
O obxectivo é mellorar capacidades de goberno e xestión no ámbito cooperativo. O obradoiro está destinado a vogais e presidencias actuais e futuras, así como a mocidade e mulleres socias das cooperativas galegas interesadas en reforzar competencias directivas e económicas.
O programa combina dous bloques: Habilidades Directivas (liderado, motivación e coresponsabilidade entre consello reitor e xerencia) e Réxime Económico do Cooperativismo (réxime fiscal, conceptos básicos de xestión, interpretación e análise de balances). As sesións impartiranas Tereza Molezún (Caterna, Grupo Elige) e David Loureiro (Orpagu, Grupo Elige).
Actuación financiada a través do Programa de Asistencia Técnica 2025 enmarcado dentro das actuacións do Convenio MAPA– Cooperativas Agro-alimentarias de España para o desenvolvemento de diversas actividades de mellora da competitividade e modernización das cooperativas agroalimentarias e a formación, igualdade e remuda xeracional en consellos reitores.
