- As entidades cambadesas acolleron esta mañá a Xornada “Atrévete Contigo Mesma” organizada por AGACA (Asociación Galega de Cooperativas Agroalimentarias) e Obra Social “la Caixa”.
- Unha técnica de AGACA especializada en Igualdade e en Coaching propuxo pautas para acadar a igualdade de oportunidades entre homes e mulleres nos órganos de decisión das cooperativas
Máis dunha trintena de socias da cooperativa Horsal e da SAT (Sociedade Agraria de Transformación) Hortumia, ambas hortícolas, asistiron esta mañá á Xornada “Atrévete Contigo Mesma”, co obxectivo de atopar xeitos de contrarrestar a escasa participación das mulleres cooperativistas nos órganos de decisión destas entidades e aprender xeitos de facilitar o seu acceso aos mesmos.
A técnica de AGACA, Loli Couso expuxo o papel das mulleres nas cooperativas agroalimentarias: o 88% dos integrantes de Consellos Reitores destas entidades en Galicia son homes, malia que falando do total de persoas asociadas a cooperativas agroalimentarias, a porcentaxe de socias ascende ao 49%. Mencionáronse ademais como posibles circunstancias que limitan a presenza de mulleres nestes postos de responsabilidade a propia crenza de carecer de preparación suficiente ou falta de tempo, segundo datos recollidos nun estudo elaborado por AGACA.
A continuación as asistentes participaron nunha sesión de coaching con exercicios de motivación. Incidiron en aspectos individuais e persoais, poñendo en valor as capacidades das socias e afondando na casuística que as afasta dos postos de responsabilidade (por exemplo, propuxéronse xeitos lograr a corresponsabilidade no fogar e a conciliación familiar). En canto ao ámbito institucional, as socias propuxeron servizos que a cooperativa podería potenciar para facilitarlles o acceso a cargos nos consellos reitores.
Implicación social
AGACA e Obra Social “la Caixa” impulsan a iniciativa “Atrévete Contigo Mesma” unha vez máis como parte do seu Plan de acción en favor da infancia, xuventude, muller e maiores 2016- 2017, creado en virtude dun convenio firmado en 2015 entre ambas entidades.
Na súa anterior convocatoria, cando se celebraron dez xornadas noutras tantas cooperativas, máis de 350 mulleres tomaron parte nas actividades. Nesta ocasión, AGACA e Obra Social “la Caixa” prevén realizar accións en oito cooperativas, entre decembro de 2016 e o primeiro semestre de 2017.
