A segunda sesión do curso ‘Granja Intelixente: Solucións IoT para monitorizar e mellorar a saúde, reprodución e produtividade animal e forraxeira’ celebrouse o venres 4 de novembro en formato híbrido, combinando participación presencial nas nosas instalacións de AGACA e seguimento online. O docente, José Carlos López Ardao, profesor titular da Universidade de Vigo e investigador do centro atlanTTic, abordou nesta xornada os contidos de diferentes módulos de formación centrados nos dispositivos IoT, tipos de sensores e tecnoloxías de comunicación aplicables ao sector.
A sesión permitiu seguir afondando en detalle no funcionamento das tecnoloxías LoRa/LoRaWAN, pensadas para a transmisión de datos a longa distancia e especialmente útiles en zonas rurais. O alumnado puido revisar exemplos de sensores comerciais e solucións modulares, entendendo as súas aplicacións prácticas para monitorizar saúde, actividade, alimentación ou reprodución animal, así como o control de cultivos e forraxes.
A primeira xornada, celebrada o 7 de novembro de forma presencial, completou os primeiros módulos que estiveron centrados na introdución á IoT e ao seu impacto na industria agropecuaria e nas características dos dispositivos IoT e nos primeiros criterios para seleccionar sensores e tecnoloxías segundo o tipo de explotación.
A terceira sesión terá lugar o 21 de novembro, tamén en formato híbrido, e tratará os contidos dos derradeiros módulos, dedicados ao almacenamento, visualización e xestión de datos IoT, así como á integración doutros recursos tecnolóxicos e os casos de éxito, orientacións prácticas para a adopción destas solucións e o papel dos hubs especializados na procura de tecnoloxías e financiamento.
EDIH DATAlife
Este curso desenvólvese no marco do proxecto EDIH DATAlife, no que AGACA é socia, e que ten como obxectivo apoiar ás empresas galegas, especialmente ás pemes, na adopción de tecnoloxías disruptivas como a IoT, a Intelixencia Artificial ou a Computación de Altas Prestacións. A través deste programa, as pemes poden acceder gratuitamente a servizos de asesoramento, acompañamento e probas de concepto incluídos no catálogo europeo dos European Digital Innovation Hubs.
A formación está dirixida a profesionais do sector agropecuario -da gandería, a agricultura, técnicos e técnicas de explotacións, cooperativas e persoal de asesoramento – e pode seguirse de maneira presencial ou a través da plataforma de streaming.
