- Esta tarde ás 18:30 horas tivo lugar a clausura deste obradoiro formativo sobre igualdade de oportunidades, empoderamento e dirección e administración empresarial, co fin de incentivar a participación das mulleres en actividades e toma de decisións na cooperativa.
- A iniciativa, impartida por AGACA, comezou o 3 de maio e enmárcase na Rede Eusumo para o fomento do cooperativismo e a economía social.
Covadonga Toca, secretaria xeral de Emprego, asistiu ás 18:30 h. ao acto de clausura do Obradoiro “Empoderamento da muller como persoa socia da cooperativa”, onde fixo entrega dos certificados ás alumnas, mostrando o apoio da Xunta de Galicia á iniciativa, destinada dar visibilidade e reforzos ás aptitudes das mulleres cooperativistas ante os requirimentos derivados da participación efectiva nunha cooperativa e nun Consello Reitor.
O Obradoiro, impartido por docentes de AGACA, comezou o 3 de maio en Viña Costeira (Valdepereira, Ribadavia – Ourense) e tratou aspectos relacionados coa administración empresarial coma planificación estratéxica, análise DAFO, desenvolvemento, seguimento e control de obxectivos, contas de resultados, lexislación ou habilidades directivas.
Incluíu tamén módulos de detección, análise e eliminación das barreiras que atopan as socias das cooperativa á hora de adquirir roles máis activos nas entidades.
Cooperativas e igualdade
Trátase do primeiro dunha serie de Obradoiros que responden á necesidade de aumentar a porcentaxe de mulleres con cargos no Consello Reitor dunha cooperativa, que só acada o 12% nas agroalimentarias galegas, malia seren mulleres o 49% dos asociados a estas entidades.
Asesoramento, orientación, formación, acompañamento nas iniciativas empresariais, apoio á internacionalización, celebración de encontros internacionais e transfronteirizos, intercambio comercial e cooperación transversal definen a rede transversal de colaboración Eusumo, nacida no 2011 co impulso da Consellería de Economía, Emprego e Industria.
