A Consellería de Emprego, Comercio e Emigración e o Consello Galego de Cooperativas celebrarán o acto oficial de clausura do Ano Internacional das Cooperativas 2025 o xoves 11 de decembro, ás 17.30 h, nun recinto cuberto situado na Praza da Quintana de Santiago de Compostela.
A xornada, aberta á cidadanía, quere poñer en valor o papel que as cooperativas desempeñan no desenvolvemento económico e social de Galicia, así como a súa contribución á cohesión territorial, ao emprego e a unha economía máis sostible. A entrada é gratuíta, só tes que reservar previamente a túa praza aquí.
Baixo o lema “É posible vivir dentro do cooperativismo”, o encontro presentarase como unha celebración colectiva que pretende achegar ao público unha visión ampla e próxima do movemento cooperativo.
A gala estará conducida por O Faiado Podcast e combinará intervencións institucionais, participación de cooperativas galegas, música, teatro e contido audiovisual preparado para a ocasión. Ademais, avanzaranse algunhas das novidades da Nova Lei de Cooperativas de Galicia, actualmente en desenvolvemento.
O acto busca ser unha experiencia aberta, dinámica e inspiradora, dirixida tanto ás persoas vinculadas ao cooperativismo como ao público xeral, especialmente á mocidade interesada en alternativas económicas e sociais transformadoras.
A organización recomenda reservar praza para facilitar e garantir o acceso ao recinto. Podes facelo nesta ligazón.
