- Cincuenta estudantes do CEIP de Portonovo participaron esta mañá no programa “Almorz@ con Beizos Brancos”, promovido por AGACA e Obra Social “la Caixa”para fomentar os almorzos saudables.
- Unha nutricionista explicou as mellores opcións para almorzar de forma adecuada e dirixiu unha actividade didáctica para mostrar o proceso de produción e transformación do leite. A xornada concluíu cun almorzo baseado en produtos naturais.
- Dende o inicio do curso académico 2016/2017, “Almorz@ con Beizos Brancos” leva distribuído á beira de 700 almorzos sans.
O programa “Almorz@ con Beizos Brancos” organizado pola Asociación Galega de Cooperativas Agroalimentarias (AGACA) e Obra Social “la Caixa”celebrou esta mañá unha xornada no CEIP de Portonovo, onde participaron 50 nenos e nenas de 4º de Primaria.
A actividade comezou mostrando os valores de diferentes alimentos típicos do almorzo, para facer ver a nenos e nenas que existen diversas alternativas ricas en compoñentes de alto valor enerxético e nutricional como poden ser as froitas de tempada e os lácteos, así como opcións menos convencionais como o aguacate, que poden tomar no canto de produtos procesados industrialmente, con exceso de azucres refinados e lípidos prexudiciais.
Tras a charla, o alumnado interveu nun xogo en grupo para aprender os traballos asociados ao sector lácteo e o camiño que segue o leite dende a granxa á mesa.
A actividade finalizou cun almorzo composto de madarinas, pan galego con aceite e leite adozado con cacao puro e mel. Para involucrar ás familias na actividade, repartiuse material divulgativo con varias opcións de almorzos sans fronte a outros non recomendados.
Obra Social “la Caixa” e AGACA inciaron o cuso pasado o programa “Almorz@ con Beizos Brancos”,cando chegou a 11 centros educativos. Ante o interese suscitado, Obra Social “la Caixa” incrementou este curso o orzamento destinado á actividade para alcanzar máis centros educativos. O CEIP de Portonovo é o décimo quinto colexio que participa na actividade este curso.
En total, Obra Social “la Caixa” e AGACA ofreceron preto de 1200 almorzos sans en colexios das 4 provincias galegas.
