- A Asociación Galega de Cooperativas Agroalimentarias (AGACA) e a distribuidora alimentaria Vegalsa-Eroski renovaron hoxe o seu Programa de Comercialización Agraria de Calidade Diferenciada, no marco da 46ª edición da Feria Abanca Semana Verde de Galicia.
- Vegalsa-Eroski incrementou un 9,3% o investimento en produtos en comparación co exercicio 2022.
No marco do Programa de Comercialización Agraria de Calidade Diferenciada levado a cabo entre a Asociación Galega de Cooperativas Agroalimentarias (AGACA) e Vegalsa-Eroski, a compañía galega de distribución alimentaria comercializou, en 2023, 1,9 millóns de quilos de produtos agrarios distribuídos en 29 referencias propias da horta galega, procedentes das dúas cooperativas integradas neste Programa conxunto: Horta de Galicia e Horsal.
Así, Vegalsa-Eroski destinou no último exercicio 2,5 millóns de euros a compras de produtos agrarios de calidade diferenciada con rastrexabilidade, incrementando un 9,3% o seu investimento con respecto a 2022. O importe destinado á adquisición dos produtos amparados baixo este programa pon de manifesto o compromiso da compañía coa produción local de calidade e, concretamente, coa horta galega.
O acto de renovación, con Higinio Mougán (director-xerente de AGACA) e José Manuel Ferreño (director xeral de Vegalsa-Eroski) en representación das dúas entidades, tivo lugar na 46 edición da Feira Abanca Semana Verde de Galicia e contou co director xeral de Gandería, Agricultura e Industrias Argoalimentarias da Xunta de Galicia, José Balseiros, así como de representantes da compañía de distribución alimentaria e dirixentes das cooperativas implicadas.
Durante a firma, Higinio Mougán agradeceu á compañía de distribución alimentaria o seu apoio a este programa un ano máis: “O compromiso das cooperativas coa calidade e sustentabilidade dos produtos de horta é firme e propoñémonos coñecer as emisións de gases dos principais produtos da horta coa finalidade de comezar a deseñar actuacións para súa redución”.
Pola súa banda, José Manuel Ferreño afirmou: “Acordos como o que hoxe renovamos e que mantemos vixente dende o ano 2011 fan posible que distribuidoras e cooperativas fagamos chegar, de forma cada vez máis eficiente e coordinada, produtos agrarios de orixe 100% galega aos consumidores e contribuamos ao desenvolvemento do tecido económico galego, á mellora da calidade de vida da contorna rural e á competitividade das súas empresas”.
Gama de produtos comercializados
Das referencias comercializadas os alimentos máis demandados polos consumidores e a súa participación sobre o total do volume foron: pementos (28), leitugas (22%), tomates (11%), feixóns (10%), repolos (9%) e o resto das referencias (20%).
Constatouse ademais unha boa acollida por parte dos consumidores aos produtos de “IV Gama Galega” que se comezaron a vender nas tendas de Vegalsa-Eroski en agosto de 2020, froito da colaboración coa cooperativa Horsal. De feito, en 2023 comercializáronse 45.000 quilos de leitugas embolsadas. Vegalsa-Eroski conta este ano poder sumar novos produtos ao proxecto de IV gama como as espinacas e as acelgas.
Sobre Vegalsa-Eroski
Vegalsa-Eroski conta en Galicia, Asturias e Castela e León con 285 establecementos entre propios e franquiados baixo as marcas comerciais hipermercados e gasolineiras Eroski, supermercados Eroski Center, Autoservizos Familia, Cash Record, Eroski City, Aliprox e Eroski Rapid. A súa estrutura comercial en Galicia esténdese polas 4 provincias galegas e conta cunha moderna plataforma de mercadorías xerais, situada en Sigüeiro (A Coruña) dotada de tecnoloxías loxísticas de última xeración, ademais das plataformas de produtos da Coruña e centros de redistribución en Vigo e Ourense.
