A Asociación Galega de Cooperativas Agrarias (AGACA) vén de renovar o seu convenio de colaboración con ABANCA no marco da feira ABANCA Semana Verde de Galicia. O acordo, asinado tamén por Boaga e Asoporcel, reafirma o compromiso conxunto de impulsar o desenvolvemento do sector agrogandeiro galego a través de solucións financeiras adaptadas ás súas necesidades.
A sinatura tivo lugar no estand de ABANCA, aberto no recinto da Feira Internacional de Galicia ABANCA en Silleda, e contou coa participación do director de Banca Sectorial de ABANCA, Jesús Combarro, e do director de AGACA, Higinio Mougán, xunto aos representantes das outras dúas organizacións asinantes: Castor José Rivero, presidente de Boaga, e Cruz Castro, técnica de Asoporcel.
Estes acordos permiten activar para os socios e socias de AGACA unha ampla oferta de produtos e servizos financeiros especializados, entre os que destacan liñas de crédito para novos investimentos, modernización das explotacións, mellora da sustentabilidade e incorporación de enerxías renovables. Tamén se inclúen convenios oficiais co IGAPE, con diferentes sociedades de garantía recíproca (SGR), coa Sociedade Anónima Estatal de Caución Agraria (SAECA) e co Instituto de Crédito Oficial (ICO).
Ademais, os asociados poderán acceder á Liña de Financiamento Agro Multidestino, unha proposta innovadora lanzada por ABANCA durante a feira Semana Verde de 2023. Esta liña permite unificar nun único contrato o financiamento necesario para anticipar as axudas da PAC, cubrir os gastos das campañas agrícolas e gandeiras, e financiar as primas de seguros agrarios contratados na entidade. O produto ofrece vantaxes como a flexibilidade na disposición dos fondos, o aforro de custos e a simplificación administrativa.
A sinatura dos convenios coincidiu coa celebración da 47ª edición da feira ABANCA Semana Verde de Galicia, que se desenvolve estes días en Silleda. ABANCA é un dos principais patrocinadores da feira e apoia tamén a estabilidade do recinto feiral, que ao longo do ano acolle numerosos encontros especializados.
ABANCA Agro, clave na estratexia de apoio ao sector
A colaboración entre AGACA e ABANCA inscríbese tamén no marco máis amplo da unidade especializada ABANCA Agro, creada hai unha década precisamente durante a Semana Verde. Esta unidade consolidou desde entón un catálogo propio de produtos e servizos dirixidos ao sector primario, cun equipo de xestores altamente formados e un volume de negocio que supera os 6.000 millóns de euros e os 60.000 clientes.
Con forte presenza en Galicia e en expansión por territorios como Castela e León, Asturias, Cantabria, Estremadura, Andalucía e Portugal, ABANCA Agro mantén a súa aposta pola proximidade co sector a través de máis dun cento de convenios con axentes clave e dunha participación activa nos principais foros agrogandeiros.
