- O proxecto, impulsado por AGACA baixo o marco europeo Interreg Poctep, inaugurouse esta mañá na capital galega.
- Nove entidades de economía social, na súa maioría, cooperativas ofrecen ao público unha experiencia directa cos seus produtos a través de stands efémeros que achegan o rural e o modelo cooperativo á cidade.
O Mercado de Abastos de Santiago de Compostela acolleu esta mañá o acto inaugural de “Espazos Efémeros de Emprendemento 2026”, iniciativa impulsada pola AGACA que busca reforzar a visibilidade do modelo cooperativo a través dun innovador formato comercial pop-up.
O acto inaugural contou coa participación de Marta Mariño, directora xeral de Traballo Autónomo e Economía Social da Consellería de Emprego, Comercio e Emigración; Herminio Martínez, presidente de ForoESGAL; e Carmen Rodríguez, presidenta de AGACA, quen destacaron o papel do cooperativismo como motor económico e social do rural galego. Estiveron arroupados por representantes das diferentes cooperativas participantes e persoas vinculadas ao sector da economía social galega.
Tras a inauguración, as autoridades realizaron un percorrido polos espazos habilitados no mercado para coñecer de primeira man os produtos e proxectos das cooperativas participantes, dialogando cos seus responsables e destacando o valor do cooperativismo como motor económico e social no rural galego.
A iniciativa continuará durante varios fins de semana no Mercado de Abastos de Santiago de Compostela, nos que o público poderá coñecer de primeira man as nove entidades participantes. Ademais de hoxe e mañá, as seguintes citas, en horario de 09:30 a 15:00 h retomaranse en maio, coas fins de semana do 8 e 9, do 22 e 23, e do 29 e 30, sempre co obxectivo de achegar o produto galego e o modelo cooperativo e de economía social á cidadanía.
Baixo o paraugas do programa europeo Interreg POCTEP a través do proxecto ES_FACTORY, “Espazos Efímeros” nace como un escaparate de innovación comercial que permitirá aos visitantes interactuar cos proxectos que definen o rural galego actual nun contorno de proximidade, sustentabilidade e excelencia.
O corazón da iniciativa está formado por expositores das seguintes marcas de entidades de economía social que representan a diversidade e calidade do produto agroalimentario galego:
- Bico de Xeado (Cooperativa Agraria Provincial de A Coruña)
- Campo Capela (Cooperativa Campo Capela)
- Queixería Dona Cobiña (Cooperativa Cobideza)
- Bodegas Eidosela (Cooperativa Eidosela)
- Entrelampo
- Moraima (Cooperativa Viña Moraima)
- Paco & Lola (Cooperativa Vitivinícola Arousana)
- Terras da Mariña (Cooperativa Terras da Mariña)
- Únicla (Cooperativa Clun)
O proxecto 0259_ES_FACTORY_1_E está cofinanciado polo Fondo Europeo de Desarrollo Regional FEDER no marco do programa Interreg VI A España – Portugal (POCTEP) 2021-2027
Máis información sobre ES_Factory na web: https://es-factory.eu/
