- O Centro Rede Eusumo Fundación Terra de Trasancos e a Cooperativa Santa María do Val acolleron esta mañá unha charla formativa para estudantes de Bergondo.
- É a primeira das actividades de fomento do emprendemento e autoemprego cooperativo entre estudantes impartidas por AGACA e Rede Eusumo durante o curso 2016/2017.
Técnicos de AGACA impartiron esta mañá na Fundación Terra de Trasancos (Vilacornelle, Narón) unha xornada didáctica sobre as vantaxes do cooperativismo como fórmula de emprendemento e de crecemento laboral e económico para unha trintena de estudantes do Centro de Formación e Experimentación Agroforestal de Guísamo.
O obxectivo das actividade é dar a coñecer este modelo ao alumnado, para que o teñan en consideración ao finalizar os seus estudos. Para iso, ofrécense exemplos de iniciativas de emprendemento cooperativo rendible no medio rural en varios sectores de negocio.
Logo da charla formativa, o grupo visitou as instalacións da cooperativa Santa María do Val, onde puideron coñecer os pormenores do funcionamento e a administración do seu supermercado e invernadoiros.
Trátase da primeira das actividades de divulgación do emprendemento de experiencias cooperativas como modelo de éxito que AGACA imparte no curso 2016/2017 para estudantes de institutos e centros de formación especializada.
O día 29, estudantes do CFEA de Sergude tomarán parte nunha actividade similar, en Trasancos.
Rede Eusumo
Asesoramento, orientación, formación, acompañamento nas iniciativas empresariais, apoio á internacionalización, celebración de encontros internacionais e transfronteirizos, intercambio comercial e cooperación transversal definen a rede transversal de colaboración Eusumo, naci¬da no 2011 co impulso da Consellería de Economía, Emprego e Industria.
