- Cincuenta estudantes de primaria do CEIP Vilaxoán (Vilagarcía de Arousa) participaron na actividade “Almorz@ con Beizos Brancos”, que aconsella sobre almorzos saudables con produtos galegos e mostra o proceso de transformación do leite
- AGACA (Asociación Galega de Cooperativas Agroalimentarias) e Obra Social “la Caixa” repiten este curso este ciclo, con 20 actividades, logo do éxito que tiveron as 12 xornadas do 2015/2016.
Máis de medio centenar de nenos e nenas de terceiro e cuarto de primaria do CEIP Vilaxoán (Vilagarcía de Arousa) tomaron parte na iniciativa de difusión de hábitos de alimentación saudable “Almorz@ con Beizos Brancos”.
A mañá comezou cunha charla educativa na que se recomendou o consumo de produtos lácteos, froitas de tempada e alimentos non procesados industrialmente para almorza e se reforzou a importancia desa comida, posto que algúns dos estudantes recoñeceron non tomar nada antes de chegar á escola.
A continuación, mediante un xogo participativo,explicouse ao alumnado os procesos que segue o leite dende a súa recollida nas explotacións ata que se pon á venda. Para rematar, a modo de exemplo de almorzo completo, os nenos e nenas probaron leite enteiro con cacao puro e mel, torradas de pan galego con aceite e froita.
Para inculcar tamén nas familias os hábitos de alimentación saudable, repartiuse material didáctico sobre nutrición e propuxéronse diferentes opcións de almorzo entre as que se inclúen produtos como froita, legumes e froitos secos, para que os nenos e nenas o transmitan nos fogares.
Compromiso social
AGACA e Obra Social “la Caixa” poñen en marcha un ano máis este programa para impulsar correcta alimentación dos nenos e nenas de Galicia e fomentar nos fogares hábitos alimentarios saudables, ademais de pór en valor os produtos do agro galego.
