- A Asociación Galega de Cooperativas Agroalimentarias reivindica o papel das cooperativistas no Día Internacional da Muller.
- Destaca o papel fundamental da muller rural como motor do desenvolvemento económico, social e demográfico dos territorios, clave para manter a actividade agraria, fixar poboación e garantir a sostibilidade do medio rural.
- A representatividade das mulleres en órganos de gobernanza das cooperativas agroalimentarias galegas aumenta, pero non reflicte a realidade da base social das entidades.
A Asociación Galega de Cooperativas Agroalimentarias (AGACA) súmase á conmemoración do Día Internacional da Muller 2026, un ano especialmente relevante no sector agroalimentario pois a Organización das Nacións Unidas declarouno Ano Internacional da Agricultora.
Carmen Rodríguez, que preside AGACA dende 2021, pon o foco na necesidade de potenciar o liderado feminino no eido cooperativo: «Se non se nos ve, non se nos escoita nin se recoñece a nosa valía».
O 44,5 % das persoas socias de cooperativas de AGACA son mulleres, unha porcentaxe que se mantén estable dende 2015. En contraste, a porcentaxe de mulleres en consellos reitores, aínda que vén en aumento nos últimos 10 anos, só acadou o 27 % en 2024 (dende un 15 % en 2015). A tendencia ascendente vese tamén na porcentaxe de presidentas (chegou ao 14,06 %) e xerentes (chegou ao 31,25 %), pero mostra unha disparidade de na representación feminina nos órganos de toma de decisión.
Nun contexto onde o rural galego afronta retos como a remuda xeracional ou a fixación de poboación, dende AGACA subliñamos o papel esencial das mulleres rurais como motor social e económico. O seu traballo sostén explotacións, impulsa a innovación e contribúe a manter vivo o territorio, polo que avanzar cara a unha maior presenza feminina nos espazos de decisión é tamén unha aposta polo futuro do rural.
Neste senso, AGACA desempeña actividades encamiñadas a acadar o equilibrio de xénero e a igualdade de oportunidades en canto á participación das mulleres nas cooperativas agroalimentarias galegas, onde se existen retos coma a conciliación da vida laboral e persoal ou a masculinización de espazos de gobernanza: «Cómpre aproveitar todo o talento que está ao alcance das cooperativas, impulsar a presenza de mulleres e persoas mozas nos órganos de decisión, seguir facendo cooperativismo con compromiso en con futuro para atraer á poboación e loitar contra a falta de remuda xeracional e o abandono do rural».
Entre as diferentes iniciativas atópanse encontros entre socias de cooperativas, xornadas de formación en diferentes áreas e de apoderamento. Ademais, as socias de cooperativas de AGACA contan coa súa propia Asociación, Nós, As Mulleres, constituída en 2020 e que actualmente conta con socias de 22 entidades.
