A Asociación Galega de Cooperativas Agroalimentarias (AGACA) súmase ao apoio do Consello Reitor de Cooperativas Agro-alimentarias de España a manifestación manifestación convocada polo COPA-COGECA este xoves 18 de decembro en Bruxelas, coincidindo coa celebración do Consello Europeo, para reclamar unha Política Agraria Común (PAC) máis xusta, viable e adecuadamente financiada máis alá de 2027, así como un Marco Financeiro Plurianual acorde cos retos do sector.
A mobilización reunirá a máis de 10.000 agricultores e cooperativistas de toda Europa, procedentes de 27 Estados membros e apoiados por máis de 40 organizacións agrarias e cooperativas, nunha protesta que se prevé histórica para esixir respostas urxentes ante o estancamento da política agraria europea.
O COPA-COGECA lembra que a agricultura e o cooperativismo agrario foron historicamente piares esenciais do proxecto europeo, garantindo o subministro de alimentos e materias primas de calidade, a cohesión territorial e a estabilidade social, especialmente no medio rural. Porén, a perda de rendibilidade, a complexidade normativa e a falta de coherencia entre o discurso político e as decisións adoptadas están a poñer en risco a rendibilidade de moitas explotacións e un proxecto europeo que afronte o futuro con máis garantías.
As organizacións convocantes reclaman ás institucións europeas respostas concretas e coherentes arredor de tres piares fundamentais:
- Unha PAC forte e ben financiada despois de 2027
- Un comercio xusto, equilibrado e transparente
- Unha auténtica simplificación normativa e seguridade xurídica
Son demandas recollidas no documento «Abonda de fume e espellos», que subliña a necesidade de pasar do discurso a medidas efectivas que permitan ao sector afrontar os retos económicos, climáticos e sociais.
AGACA e Cooperativas Agro-alimentarias de España, xunto coas organizacións agrarias e cooperativas europeas, apoian esta mobilización, formando parte tamén da súa organización, para visibilizar a necesidade de políticas agrarias realistas que recoñezan o carácter estratéxico da agricultura no actual contexto xeopolítico e no marco dos debates sobre a reforma do marco financeiro e da PAC.
Ademais, reclamamos un maior apoio das políticas europeas, estatais e rexionais para desenvolver o modelo de empresa cooperativa agroalimentaria, empresas propiedade de agricultores e gandeiros que estruturan o sector, facilitan o acceso ao mercado, achegan valor e rendibilidade ás persoas socias, reducen custos de produción e impulsan o emprego, o crecemento e os servizos nas zonas rurais das que nunca se deslocalizan.
Desde o movemento cooperativo insístese en que a Unión Europea debe equilibrar os obxectivos ambientais coa sostibilidade económica das explotacións, evitando esixencias regulatorias que comprometan a produción, o investimento e o relevo xeracional.
A manifestación volve poñer de relevo que o futuro da agricultura europea está en xogo e que só será posible garantilo mediante políticas que escoiten o sector e ofrezan ferramentas eficaces e proporcionadas para asegurar a súa competitividade e viabilidade a longo prazo.
