- Obra Social “a Caixa” e a Asociación Galega de Cooperativas Agroalimentarias (AGACA) desenvolveron onte na cooperativa láctea Feiraco a iniciativa “Coidar, coidarte” para contribuír ao envellecemento activo e a atención a maiores.
Preto de corenta persoas socias da cooperativa Feiraco (Ames) participaron na tarde de onte na iniciativa “Coidar, coidarte”. A actividade constou dunha charla sobre a situación das persoas maiores no medio rural e o papel das cooperativas na mellora da súa calidade de vida así como a das persoas encargadas da súa atención, a cargo da técnica de AGACA Ruth Rodríguez.
A continuación, Marisol Suárez e Silvia Fondo, profesionais en atención a persoas maiores e con dependencia explicaron diferentes modos de mitigar a deterioración asociada ao envellecemento, a nivel físico, psicolóxico e social, e demostraron con axuda do público, varias técnicas para mobilizar a persoas con dificultades para desprazarse.
Xunto con José Montes, presidente de Feiraco e tamén de AGACA, participaron na inauguración e clausura da xornada Laura Lema, responsable de Negocio Agrario de CaixaBank en Galicia, e Carmen Rodríguez, vicepresidenta de Feiraco.
Compromiso social
“Coidar, coidarte” ten como obxectivo que tanto as persoas maiores como quen estea a cargo da súa atención gocen dun maior benestar no seu día a día.
É unha das iniciativas que Obra Social “a Caixa”·desenvolve, en colaboración con AGACA, como parte do “Plan de acción en favor da infancia, mocidade, muller e maiores 2016- 2017”, que inclúe actividades para o empoderamiento das mulleres cooperativistas, o fomento da incorporación de mozas a actividades agrarias e mellora da alimentación infantil.
