COMUNICADO DE PRENSA: ASAJA E COOPERATIVAS AGRO-ALIMENTARIAS DE ESPAÑA
- ASAJA e Cooperativas Agro-alimentarias de España pediron ao Ministerio de Agricultura na reunión do 5 de abril que non ceda á presión destas empresas
A organización agraria ASAJA e Cooperativas Agro-alimentarias de España denuncia as presións e manobras que está a levar a cabo a asociación Aniteaf co único obxectivo de lograr a implantación dun réxime de oligopolio, controlado por eles mesmos, na inspección de equipos fitosanitarios. Tanto é así, que os membros da citada entidade convocaron o 5 de abril unha concentración ás portas do Ministerio de Agricultura para esixir unha serie de cambios lexislativos que lles permitan, por unha banda, manexar ao seu antollo e en exclusividade toda a estrutura dedicada ao control técnico da maquinaria que se usa na aplicación de produtos fitosanitarios na agricultura e, doutra banda, impedir que as organizacións agrarias e as cooperativas agroalimentarias poidan seguir realizando este tipo de inspeccións obrigatorias, denominadas Iteaf.
ASAJA e as Cooperativas Agro-alimentarias de España entenden que Aniteaf emprendeu unha campaña, baseada en argumentos falsos e totalmente cuestionables, para eliminar calquera forma de competencia e lembran que desde que se instaurou en España, seguindo as directrices comunitarias, a obrigatoriedade de que os equipos fitosanitarios pasasen unha serie de inspeccións as organizacións agrarias e as cooperativas, previamente autorizadas pola Administración, viñeron cumprindo este labor a enteira satisfacción e sen incidencias.
Sobre este último aspecto, ASAJA e as Cooperativas Agro-alimentarias de España lembran que as consellerías de Agricultura das diferentes comunidades autónomas someten ás entidades agrarias e cooperativas interesadas en participar na Iteaf (Inspección Técnica de Equipos de Aplicación de Fitosanitarios) a unha exhaustiva supervisión, tanto de carácter documental como de execución da propia inspección. É máis, ASAJA e as Cooperativas Agro-alimentarias de España defenden mesmo que as administracións autonómicas aumenten ese tipo de controis e que dispoñan dos medios adecuados para facelo.
Con todo, o sector de empresas privadas dedicadas a realizar a Iteaf, non ve con bos ollos a presenza de organizacións agrarias e cooperativas nese segmento do mercado e decidiu pasar á acción para eliminalos do mapa defendendo a conveniencia de poñer en marcha un sistema de certificación que substitúa o papel de vixilancia que os gobernos autonómicos exercen neste ámbito. Por todo iso, ASAJA e as Cooperativas Agro-alimentarias de España consideran que a asociación Aniteaf pretende privatizar o servizo e impoñer unhas regras do xogo deseñadas á súa propia medida.
Ademais, as organizacións que representan os intereses dos agricultores e as cooperativas esixen ao Ministerio de Agricultura que non ceda ás presións de Aniteaf porque entre as consecuencias indesexables que iso supoñería a máis negativa sería o encarecemento dos prezos que teñen que pagar os agricultores pola prestación do servizo de inspección dos seus equipos fitosanitarios. Actualmente, as organizacións agrarias e cooperativas autorizadas realizan o mencionado control deste tipo de maquinaria a un prezo competitivo para o produtor, dentro da lóxica do mercado de cada zona.
07/04/217
