- La xornada “Coidar, coidarte” celebrouse esta mañá na cooperativa Agraria Comarcal de Ordes, onde se mostraron técnicas para mellorar a atención a maiores e se oferceron consellos para envellecer con saúde.
- Obra Social “la Caixa” e a Asociación Galega de Cooperativas Agroalimentarias (AGACA) desenvolven a iniciativa.
Esta mañá celebrouse unha das xornadas do programa “Coidar, coidarte” nas instalacións da cooperativa Agraria Comarcal de Ordes, na que participaron 24 persoas socias. Comezou cunha charla sobre o papel das cooperativas na mellora do benestar das persoas maiores do medio rural a cargo de Ruth Rodríguez, axente de Igualdade de Xénero en AGACA.
A continuación, Silvia Fondo, profesional da atención a persoas maiores e con dependencia explicou modos de mitigar a deterioración asociada ao envellecemento, a nivel físico, psicolóxico e social, para que tanto as persoas maiores como as que estean encargadas da súa atención gocen dun maior benestar no seu día a día.
Ademais, con axuda do público, demostráronse técnicas para a correcta mobilización e coidado no fogar de persoas maiores ou con dependencia.
Compromiso social
Unha característica de Galicia é a avanzada idade da súa poboación: segundo datos recompilados por AGACA, nos últimos anos, a porcentaxe de cooperativistas do sector agroalimentarios maiores de 55 anos oscila entre o 20 e o 40% dependendo do subsector.
Ante esta realidade, Obra Social “la Caixa” e AGACA impulsan “Coidar, coidarte” como modo de dirixirse tanto ás necesidades dese tramo de poboación como ás das persoas que teñen a alguén de avanzada idade ao seu cargo.
31/01/2018
