- A cooperativa Milhulloa (Palas de Rei) recibiu esta mañá a estudantes do IES Sanxillao (Lugo) nunha xornada didáctica.
- A actividade forma parte da Rede Eusumo para impulsar o cooperativismo e a economía social.
O alumnado de bacharelato do instituto Sanxillao participou no obradoiro “Divulgación do emprendemento de experiencias cooperativas como modelo de éxito” que tivo lugar esta mañá na cooperativa Milhulloa.
O obxectivo é dar a coñecer o cooperativismo entre o estudantado, para que o teñan en consideración ao finalizar os seus estudos. Para iso, persoal de Milhulloa guiounos polas instalacións da cooperativa e explicoulles o proceso de cultivo, de preparación, de secado e de envasado das súas especias e herbas medicinais e a elaboración de cosméticos, así como as distintas fases que pasou a cooperativa no seu camiño cara a constituírse como un negocio rendible.
Asociación Galega de Cooperativas Agroalimentarias (AGACA) organiza a actividade, que se celebra no marco da Rede Eusumo. O pasado curso participaron nestes obradoiros máis de 900 estudantes.
Rede Eusumo
Esta actividade enmárcase na Programación da Rede Eusumo. A Rede Eusumo é unha rede de colaboración impulsada pola Secretaría Xeral de Emprego da Xunta de Galicia para o fomento do cooperativismo e a economía social que conta co financiamento do Ministerio de Traballo, Migracións e Seguridade Social.
