- Un grupo de estudantes do IES Pedregal de Irimia (Meira) participará mañá nunha charla divulgativa, impartida por AGACA nas instalacións de Feiraco, que funciona como Centro Rede Eusumo.
- O xoves, será o alumnado do IES Río Miño (Rábade) quen viaxe ata a cooperativa láctea.
- As actividades enmárcanse na Rede Eusumo para o fomento do cooperativismo.
Un grupo de estudantes de bacharelato do instituto Pedregal de Irimia, en Meira (Lugo), recibirá mañá na sede da cooperativa Feiraco (Ames – A Coruña) unha charla formativa sobre as oportunidades e vantaxes que o cooperativismo presenta como modelo de negocio para que mozos e mozas no medio rural galego o teñan en conta como opción de emprendemento e desenvolvemento profesional unha vez rematen os seus estudos.
Ademais de tratar aspectos empresariais, a charla amosará a importancia social do modelo cooperativo en cuestións como a fixación de poboación ou a prestación de diversos servizos ás persoas asociadas a nivel laboral e tamén social. Para ilustrar a formación, presentaranse diversas experiencias de éxito no eido cooperativo, en diferentes sectores de actividade, tanto agroalimentarias como de consumo.
Os mozos e mozas terán ocasión de percorrer as instalacións de Feiraco para coñecer de primeira man os pormenores do funcionamento dunha cooperativa dedicada á transformación de leite.
O xoves será o alumnado de terceiro curso de Educación Secundaria Obrigatoria do IES Río Miño (Rábade) quen se desprace ata Feiraco para tomar parte na iniciativa.
Seis anos de actividades Rede Eusumo
Asesoramento, orientación, formación, acompañamento nas iniciativas empresariais, apoio á internacionalización, celebración de encontros internacionais e transfronteirizos, intercambio comercial e cooperación transversal definen a rede transversal de colaboración Eusumo, nacida no 2011.
Dende o ano 2012 a Fundación Feiraco funciona coma un dos “Centros Rede Eusumo” repartidos por toda Galicia que serven como espazo de dinamización do emprendemento cooperativo.
A través da páxina web www.eusumo.gal pódese consultar o directorio de locais ou instalacións que a Consellería de Economía, Emprego e Industria e as entidades colaboradoras poñen a disposición da Rede.
