- A Consellería de Economía, Emprego e Industria potencia esta Rede de Intercooperación para a valorización de residuos agrarios, enmarcada no programa iCOOPERA.
- Para favorecer o contacto e o establecemento de sinerxías entre os participantes terá lugar o 1 de febreiro no CIAM (Centro de Investigacións Agrarias de Mabegondo) a Xornada “Valorización de residuos agrarios” que contará coa participación de expertos en optimización do tratamento de residuos.
A valorización dos residuos agrarios, tanto os orgánicos coma os inorgánicos, é un factor clave na estratexia de innovación de todas as cooperativas gandeiras e das súas persoas socias. O 1 de febreiro poderase contar coa perspectiva de persoas expertas nesta área e a de cooperativistas do sector agrario, de xeito que mediante a análise e posta en común das problemáticas, necesidades e oportunidades das cooperativas agrarias e gandeiras no relativo ao tratamento de residuos, se consiga establecer redes de intercooperación para extraer valor da súa xestión.
Entre as temáticas que se analizarán, atópase o dimensionamento de fosas dende un punto de vista agronómico para o aforro en gastos de fertilización e custos e a xestión de efluentes, augas pluviais e xurros.
Redes de Intercooperación iCOOPERA
As Redes de Intercooperación son conxuntos de cooperativas que traballan conxuntamente, transmitindo coñecementos, intercambiando servizos etc. para obter resultados compartidos e beneficiosos para todos os participantes. Isto permite un fortalecemento e enriquecemento do tecido cooperativo e a economía social.
Esta xornada sobre “Valorización de residuos agrarios” celébrase no marco das Redes de Intercooperación do proxecto iCOOPERA (Programa de promoción do cooperativismo mediante o impulso da I+D+i e a utilización das TIC, promovido pola Consellería de Economía, Emprego e Industria).
A inscrición pode realizarse escribindo a estudos2.agaca@gmail.com ou chamando ao teléfono 981.584.911 (Sandra).
Consulte o programa completo en Documentación 1.
