03/09/2015
- As cooperativas de segundo grao Delagro (Asturias, Cantabria e Galicia) e Ucanorte (Douro, Minho e Tras-Os-Montes) levantarán unha “central de compras” que ampliará a área de influencia e o volume de compras de ambas as dúas entidades
- Os presidentes de Delagro (Javier Taboada) e Ucanorte (Victor Maia), xunto co Secretario Xeral do Medio Rural da Xunta de Galicia (Tomás Fernández-Couto) e o Secretario de Estado de Alimentación de Portugal (Nuno Brito), estiveron presentes no acto
A III Agrosemana, unha das feiras agrícolas máis importantes do Norte de Portugal, organizada pola cooperativa Agros, foi o escenario escollido para formalizar esta mesma tarde, a firma do contrato que vincula a Delagro S. Coop. e Ucanorte XXI U.C.R.L. na creación dunha central de compras, que operará na cornixa cantábrica, Galicia e a rexión norte de Portugal.
Tanto Delagro coma Ucanorte caracterízanse por ser das maiores unións de cooperativas dos seus respectivos territorios, agrupando Delagro a 64 cooperativas en Asturias, Cantabria e Galicia, e Ucanorte a 50, nas rexións de Douro, Minho e Tras-Os-Montes, no norte de Portugal.
A Central aproveitará as sinerxías xeradas polo volume de compras e a firme armazón industrial e asociativa das sociedades, “procurando a definición de produtos e servizos cuxa relación de calidade, servizo e prezo sexa a máis axeitada para os agricultores e gandeiros, así como para o conxunto da poboación do medio rural”.
Delagro e Ucanorte desenvolven a súa actividade en diversas áreas relacionadas coa produción agraria, dende a fabricación e distribución de insumos para agricultura e gandería, ata a mercadotecnia, o medioambiente ou os sistemas informáticos de xestión de procesos de traballo.
Segundo os responsables das entidades, a creación de “plataformas europeas de gran dimensión”, como a resultante do acordo intercooperativo entre Delagro e Ucanorte, permitirá a utilización de recursos e sinerxías para reducir os custos de produción dos asociados a cooperativas.
A iniciativa formalízase tras máis dun ano de relacións de cooperación e cordialidade, promovidas pola Asociación Galega de Cooperativas Agroalimentarias (AGACA), firme defensora da cooperación interterritorial e do aproveitamento de sinerxías.
Taboada destacou que os “principios de integración cooperativa e de responsabilidade social”, repercuten na mellora do traballo agrario e no desenvolvemento da economía do medio rural.
Fernández-Couto, pola súa banda, incidiu na importancia da colaboración transnacional das cooperativas para a economía do medio rural.
