A elevada concentración produtiva primaria de Galicia na produción gandeira deixa no esquecemento parcial a importancia da nosa produción vexetal. Fálase pouco de todo o relacionado cos enormes esforzos de sostibilidade ambiental que están a levar a cabo os produtores de horta, viño, patacas… Nada se comenta da redución de uso de produtos fitosanitarios, da redución de uso de fertilizantes e da reciclaxe dos residuos orgánicos e inorgánicos que as explotacións de produción vexetal levan a cabo.
Fálase pouco de todo o relacionado
cos enormes esforzos de sostibilidade
ambiental que están a levar a cabo os
produtores de vexetais
Coa subida das temperaturas medias e a elevadísima humidade en Galicia, con máis ou menos chuvias en case todos os meses do ano, os produtores deben facer fronte a esta combinación de maior humidade e maior temperatura que provoca, fundamentalmente, numerosas pragas de fungos. Coa enorme redución de materias activas fitosanitarias para loitar contra os fungos levada a cabo polas autoridades, as estratexias de loita de maior éxito están centradas nas boas prácticas de manexo e tratamentos de prevención que se dirixen e aconsellan dende institucións coma os centros de investigación pública (EF Areeiro), cooperativas e redes de aviso. Iso axudou a reducir as materias primas de maior impacto ambiental e a achegármonos a un control integrado de pragas, de tal xeito que se eviten problemas de residuos nas colleitas máis destacadas.
Neste senso, esta estratexia levou a algunhas cooperativas a abrir modestamente o camiño cara aos inicios da horticultura ecolóxica, por exemplo, comprometéndose con novas prácticas agronómicas sostibles (introdución de plantas de alimentación de insectos, uso de fauna útil en invernadoiros, plantas refuxio para insectos beneficiosos, uso de cubertas vexetais etc.). Pronto se implantarán diferentes sensores que orientarán aos produtores cara a unha maior eficacia no uso da auga e de fertilizantes. A reciclaxe de plásticos e de envases fitosanitarios de uso profesional vai por bo camiño neste ámbito produtivo, mentres que a dos restos orgánicos non ofrece maiores problemas aos produtores e cooperativas do sector.
O incremento de producións nalgún dos subsectores agrícolas non impide baixar a dependencia dos praguicidas químicos, ao tempo que coa axuda dos organismos públicos e cooperativas se melloran a súa xestión e a dos residuos. As melloras medioambientais comezan a ser perceptibles, e repercuten nun incremento da biodiversidade nun territorio coma o galego, onde a Superficie Agraria Útil (SAU) é a máis baixa das comunidades autónomas da Península. Aínda queda camiño que percorrer, pero as producións vexetais están no bo camiño para ser sostibles.
Dende AGACA tratamos de ser unha
ferramenta de valor para as producións
vexetais que permita afrontar novos
retos e investimentos.
Dende AGACA tratamos de ser, tamén, unha ferramenta de valor para as producións vexetais que permita afrontar novos retos e investimentos potenciando a remuda xeracional, a intercooperación, a innovación e a sostibilidade, poñendo en marcha novos proxectos de interese para o sector (ES-Factory, Oligalicia…). Ao mesmo tempo, seguiremos avanzando no estudo de diferentes modelos cooperativos para facer fronte aos retos de sostibilidade do sector, pois queremos facer esta viaxe xuntos porque estamos convencidos de que o futuro será cada día máis cooperativo e sostible, tamén nos ámbitos da produción vexetal galega.
Leer revista completa:
