- Medio centenar de alumnos de secundaria de EFA Fonteboa (Coristanco) visitaron esta mañá Feiraco e, onte, un grupo de estudantes do IES Leiras Pulpeiro (Lugo) estiveron na SAT Casa Grande de Xanceda para aprender sobre economía social e cooperativismo.
- As actividades enmárcanse na Rede Eusumo para o Fomento do Cooperativismo e a Economía Social.
Esta mañá 52 estudantes de primeiro, segundo e terceiro de secundaria da Escola Familiar Agraria Fonteboa estiveron en Fundación Feiraco e onte foron os estudantes de Formación Profesional do instituto lucense Leiras Pulpeiro que cursan estudos especializados en calidade, produción e comercialización quen viaxou a SAT Casa Grande de Xanceda para participar n talleres de “Emprendemento e cooperativas. Modelo de éxito”.
O obxectivo das actividades, realizadas no marco da Rede Eusumo, é dar a coñecer este modelo de negocio estudantes, para que o teñan en consideración ao finalizar os seus estudos como fórmula de emprendemento ou crecemento profesional.
Ademais da formación teórica sobre as características e vantaxes que ofrece o cooperativismo, os estudantes que acudiron a Feiraco puideron visitar a planta de transformación láctea da cooperativa e aprender o seu funcionamento e, en canto a Casa Grande de Xanceda, a SAT ofrece tamén un percorrido polas súas instalacións para mostrar desde o manexo do gando ata a propia fabricación de iogures, queixos e outros alimentos con base láctea e ecolóxicos.
Rede Eusumo
Asesoramento, orientación, formación, acompañamento nas iniciativas empresariais, apoio á internacionalización, celebración de encontros internacionais e transfronteirizos, intercambio comercial e cooperación transversal definen a rede transversal de colaboración Eusumo, nacida no 2011 co impulso da Consellería de Economía, Emprego e Industria.
O curso pasado participaron máis de 800 estudantes de 26 centros educativos nas actividades de AGACA e Rede Eusumo.
