- O 7 de maio terá lugar a xornada «Creación de Emprego e Riqueza mediante o Uso Cooperativo do Monte Comunal«, centrada na identificación e potenciación dos recursos dos montes en man común para os veciños, mediante a súa xestión cooperativizada.
- Terá lugar no Centro de Desenvolvemento Cooperativo Transfronteirizo de Verín.
- AGACA organiza a actividade co apoio da Consellería de Economía, Emprego e Industria, a través da Rede Eusumo.
- As persoas interesadas poden inscribirse de forma gratuíta chamando ao 981 58 47 83 ou premendo aquí.
En Galicia existen 2.835 Comunidades de Montes Veciñais en Man Común (CMVMC), que controlan preto de 650.000 hectáreas forestais, tradicionalmente destinadas á produción madeireira e á instalación de parques eólicos, dúas das principais actividades xestionadas polas CMVMC.
A Xornada, orientada a persoas especializadas na xestión destas superficies, pretende visualizar vías complementarias, aínda infravaloradas, de impulso da rendibilidade dos montes veciñais, baixo o réxime de xestión cooperativizada.
Ademais de expoñer aspectos administrativos e lexislativos que afectan ás comunidades de montes, os relatorios amosarán exemplos concretos de aproveitamento beneficioso dos terreos forestais en man común; entre eles, cría de animais e produción de castaña, oliva e cogomelo.
A iniciativa está impulsada pola Consellería de Economía, Emprego e Industria, mediante a Rede Eusumo para o fomento do cooperativismo e a economía social e o Plan de Formación e Divulgación da Potencialidade do Cooperativismo.
