- Medio centenar de persoas socias da cooperativa Icos (Lugar de Sobeira-Fornas, Chantada) participarán en dous cursos homologados para a obtención do carné de aplicador e manipulador de produtos fitosanitarios.
AGACA (Asociación Galega de Cooperativas Agroalimentarias) impartirá entre o día 1 e o 12 de agosto dous cursos orientados á obtención do carné obrigatorio para a adquisición e emprego profesional de produtos fitosanitarios.
A primeira das accións formativas dá comezo esta tarde e finalizará 5 de agosto; a segunda comezará o 8 de agosto e rematará o día 12.
O medio centenar de persoas inscritas nestes cursos de nivel básico de Aplicador/Manipulador de Produtos Fitosanitarios recibirá formación teórica e práctica que cobre os ámbitos esenciais para traballar de forma segura con estas substancias; entre as materias que se tratarán están: tipoloxía, manexo e hixiene de equipos de aplicación, tipos e doses de produtos fitosanitarios, normas de seguridade e prevención de riscos e interpretación de etiquetas.
AGACA conta coa homologación da Consellería do Medio Rural para a impartición de cursos de obtención de carnés, tanto de nivel básico como superiores, no ámbito fitosanitario e vén realizando accións, adaptadas ás necesidades das cooperativas, nas que participaron xa máis de 300 persoas.
