- Máis de trinta persoas asociadas e traballadoras de tres cooperativas galegas participarán en cursos de manexo de maquinaria, obtención do CAP e primeiros auxilios, impartidos por AGACA.
- Os cursos son financiados pola Fundación Tripartita, en virtude dun convenio asinado con Cooperativas Agro-alimentarias de España.
Hoxe comeza a primeira das accións formativas, na cooperativa Mopán (Monterroso, Lugo), onde dez socios e traballadores tomarán parte nun curso de Manexo Seguro de Carretillas Elevadoras e Transpaletas. Durante unha semana afondarán en materias como lexislación de seguridade laboral, prevención de riscos, mecánica, ergonomía ou procedementos de traballo.
O próximo luns comezan dous cursos. Na cooperativa Melisanto (Melide, A Coruña) impartirase, para unha ducia de transportistas, formación para obter o Certificado de Aptitude Profesional (CAP) entre o 14 e o 28 deste mes. Os socios e traballadores de AGRIS (Lugo) aprenderán, durante catro xornadas, diversas técnicas de primeiros auxilios.
Seguridade e calidade
Continúa así o compromiso de AGACA coa formación continua dos profesionais do sector agroalimentario, para garantir non só a mellora das súas condicións laborais senón tamén a calidade dos produtos cooperativos que chegan ao consumidor.
