- A próxima semana terá lugar a segunda das seis xornadas do ciclo de Creación de Emprego e Riqueza mediante o Uso Cooperativo do Monte Comunal, centrado na identificación e potenciación dos recursos dos montes en man común para os veciños, mediante a xestión cooperativa.
- A cita será o día 12 en Bande (Ourense).
- AGACA organiza as xornadas co apoio da Consellería de Economía, Emprego e Industria, a través da Rede Eusumo.
En Galicia existen 2.835 Comunidades de Montes Veciñais en Man Común (CMVMC), que controlan preto dun terzo dos 2 millóns de has de monte galego. Tradicionalmente, estes terreos empregáronse para produción madeireira que, xunto coa instalación de parques eólicos, é unha das principais actividades xestionadas polas CMVMC.
A Xornada, orientada a persoal especializado na xestión de montes veciñais e de man común (MVMC), pretende visualizar vías complementarias, aínda infravaloradas, de impulso da rendibilidade dos montes veciñais, baixo o réxime de xestión cooperativa.
O seminario tratará aspectos económicos e lexislativos marcados pola nova Lei de Montes, a cargo do experto en asesoría de comunidades de montes Calixto Escariz. En canto á administración dos MVMC, Higinio Mougán, director-xerente de AGACA, explicará modos de xestión cooperativa dos seus recursos ociosos.
Manuel Eirín, director xerente da empresa Gaélica Solar, afondará en xeitos de lograr a eficiencia enerxética e na identificación de iniciativas innovadoras no medio rural.
Casos de éxito
A Xornada concluirá mostrando iniciativas de éxito na explotación dos MVMC, entre elas usos relacionados coa crianza de animais e coa produción de arandos, castañas e olivas.
A iniciativa está impulsada pola Consellería de Economía, Emprego e Industria, mediante a Rede Eusumo para o fomento do cooperativismo e a economía social e o Plan de Formación e Divulgación da Potencialidade do Cooperativismo.
Para inscribirse, pode chamar ao 981 58 47 83, escribir a berta.agaca@agaca.coop ou completar este formulario online.
Lugar: Salón de Actos – Concello de Bande, Rúa San Roque, nº 2 – 2º.
Data e hora: sábado 12 de marzo. De 09:30 a 14:30 h.
Pode consultar o programa completo en «Documentación 1»
