AGACA amosa en Cenlle cómo crear riqueza cos montes comunais
- O 18 de xullo os presidentes e representantes das comunidades de montes de Ourense e Pontevedra están convocados á Xornada sobre Creación de Emprego e Riqueza mediante o Uso Cooperativo do Monte Comunal, en Cenlle.
- Expertos en rendibilidade e lexislación forestal como o maxistrado no Tribunal Superior de Xustiza de Galicia, Fernando Alañón, explicarán cómo identificar e potenciar os recursos dos montes en man común para os veciños.
O seminario, orientado a persoal especializado na xestión de montes veciñais e de man común (MVMC), contará con 9 relatorios que se centrarán tanto en aspectos administrativos e lexislativos como en exemplos concretos de aproveitamento dos terreos forestais en man común.
Dentro dos aspectos máis normativos, Fernando Alañón, maxistrado no Tribunal Superior de Xustiza de Galicia, inaugurará a Xornada explicando a Lei 7/2012 de Montes de Galicia, xunto con Manuel Eirín, director xerente da empresa Gaélica Solar, que falará tamén do aproveitamento sostible do monte, tomando como exemplo a Comunidade de Montes de Beariz. Ademais, Calixto Escariz, experto e asesor de comunidades de montes, ofrecerá alternativas xurídicas e organizativas dos recursos naturais e ociosos das comunidades de montes.
No que respecta á xestión cooperativa dos recursos ociosos dos MVMC, será Higinio Mougán, director-xerente de AGACA, quen expoña o tema.
Casos de éxito
En canto aos tipos de cultivos e producións que poden favorecerse nos MVMC, a Xornada centrarase nas experiencias da Comunidade de Montes de Cabral (Vigo) coas trufas, presentada polo seu presidente Luis Rodríguez; do Monte Comunal de Torneiros-Porriño, coas olivas; da cooperativa Amarelante, coa castaña, e, tamén, a dun produtor de arandos e froitos silvestres. De xeito máis global, Tomás Sancho, concelleiro e dinamizador rural de Beariz, contará o caso de éxito do municipio.
O Centro Cooperativo da Fundación Coren, situado no lugar de Razamonde do municipio ourensán de Cenlle, será o lugar de celebración da Xornada sobre Creación de Emprego e Riqueza mediante o Uso Cooperativo do Monte Comunal. O seminario dará comezo ás 9:30 horas, e rematará cun xantar a partir das 15:00 horas.
A iniciativa está impulsada pola Dirección Xeral de Traballo e Economía Social, mediante a Rede Eusumo para o fomento do cooperativismo e a economía social.
