- Sara Sánchez, alumna de 4º de Primaria do CEIP Santa María do Castro (Boiro), gañou o primeiro Premio do Concurso Pequenos Relatos na categoría de cuarto de primaria.
- En nome do colexio, a súa directora, recolleu un cheque de 500 euros.
- O Premio foi convocado no marco do programa “Almorz@ con Beizos Brancos”, impulsado pola Asociación Galega de Cooperativas Agroalimentarias ( AGACA) e Obra Social “la Caixa” para fomentar a nutrición sa.
Esta mañá celebrouse a entrega do Primeiro Premio do Concurso Pequenos Relatos AGACA no colexio de Boiro, Santa María do Castro.
A alumna Sara Sánchez escribiu un relato curto titulado “A nena que se converteu en nube”, que resultou vencedor na categoría de 4º de Primaria. Recibiu como premio unha tableta electrónica e un lote de 5 libros. O colexio, pola súa banda, recibiu un cheque por valor de 500 euros.
A propia Sara describiu a súa paixón por escribir como algo que non pode expresar con palabras, “que lle sae da alma”.
O I Concurso de Pequenos Relatos AGACA foi convocado este curso académico no marco do programa sobre nutrición sa “Almorz@ con Beizos Brancos”. O certame busca fomentar a imaxinación dos nenos e nenas e atraer a súa mirada cara ao mundo rural, a agricultura e a gandería..
O director- xerente de AGACA, Higinio Mougán, xunto con Francisco Sarasquete, como representante de CaixaBank, participaron na entrega. Valoraron positivamente a participación da estudante no certame e destacaron a importancia de que os escolares sexan conscientes da importancia do mundo rural para Galicia.
A colaboración entre Obra Social “la Caixa” e AGACA remóntase a 2015 e inclúe outras iniciativas destinadas a resolver necesidades específicas doutros colectivos como son o empoderamento da muller cooperativista, a mellora da atención a persoas maiores no fogar ou a incorporación de persoas mozas á actividade profesional no mundo rural.
