- Esta mañá un grupo de alumnos do CEIP Insua Bermúdez (Vilalba) recibiron formación sobre o funcionamento dunha cooperativa nunha visita á Fundación Terra de Trasancos, situada en Narón.
- A actividade forma parte da Rede Eusumo, promovida pola Consellería de Economía, Emprego e Industria para impulsar a economía social e o cooperativismo como modelo de negocio de éxito.
Unha trintena de escoalres de quinto de Primaria do colexio Insua Bermúdez de Vilalba participou esta mañá nunha charla sobre as vantaxas do cooperativismo para traballar no sector agroalimentario, impartida por técnicos de AGACA na Fundación Terra de Trasancos. A iniciativa enmárcase nun dos Obradorios “Emprendemento e cooperativas. Modelo de éxito” da Rede Eusumo.
A continuación, acompañados por traballadores da entidade, nenos e nenas visitaron as instalacións de Terra de Trasancos, que conta con invernadoiros e tamén ofrece servizos de carácter máis social como poden ser tenda ou perruquería. Deste xeito, o alumnado puido coñecer de primeira man o funcionamento dunha entidade que funciona coa base da economía social.
Rede Eusumo
A Fundación Terra de Trasancos funciona como un dos “Centros Rede Eusumo” para a dinamización do emprendemento cooperativo.
Asesoramento, formación, acompañamento nas iniciativas empresariais, apoio á internacionalización, celebración de encontros internacionais e transfronteirizos, intercambio comercial e cooperación transversal son outras áreas de actividade que definen a Rede de colaboración Eusumo, promovida pola Consellería de Economía, Emprego e Industria.
