- AGACA apoia as iniciativas de impulso de participación feminina nas cooperativas do sector agroalimentario.
- Un 49% de persoas socias de cooperativas agroalimentarias en Galicia é muller, pero só un 12% de cooperativas contan con mulleres no seu Consello Reitor.
Santiago de Compostela, 7 de marzo de 2017.- En 2015 Nacións Unidas promoveu un estudo mundial sobre o papel das mulleres no cooperativismo; o 80% das enquisadas afirmou que as cooperativas supoñen unha mellor opción que outras empresas para a inclusión e integración laboral feminina e o avance na equidade de xénero; o 70%, pola súa banda, consideraba que as cooperativas estaban a aumentar os seus programas para equidade de xénero.
Con respecto a España, segundo o INE, a taxa de feminización no sector agropecuario en España en 2016 foi do 23%, aínda que a cantidade de mulleres empregadas nesta rama económica vén acusando un descenso progresivo nos últimos anos.
En Galicia, segundo datos da Consellería do Medio Rural, no 46,95% das explotacións agrogandeiras consta unha muller como titular. En canto ao sector do cooperativismo agroalimentario, as cifra tamén son moi similares (51% de homes fronte ao 49% de mulleres), aínda que elas non ocupan aínda unha porcentaxe siginificativa en postos de responsabilidade (12% en consellos reitores; 3% en presidencias).
En 2016 AGACA publicaba o estudo “Coñecendo o cooperativismo na gandería”, que permitía unha mirada específica nese sector (con datos de 2013), que conta cun 40% de mulleres socias. No que respecta á participación activa, a media de asistencia ás asembleas societarias era do 54% de persoas (1% menos que nas agroalimentarias), das cales o 73,4% son homes.
En consellos reitores, a presenza feminina era do 13% e en presidencias do 5,7%; nas xerencias, en cambio, rolda o 30%, cifra superior á cooperativas agroalimentarias en conxunto, que suman un 23% de mulleres xerentes.
Compromiso coa equidade
Desde AGACA lévanse a cabo diversas iniciativas para dar visibilidade ao papel das socias de cooperativas e tamén ás súas necesidades e reclamacións. “Atrévete Contigo Mesma” — desenvolvida xunto con Obra Social “la Caixa”— é unha das actividades a este respecto. Iniciada en novembro de 2015, participaron nela máis de 500 mulleres que recibiron charlas sobre empoderamento e motivación para tomar parte activa na estrutura administrativa e consellos reitores de cooperativas.
Entre as demandas das asistentes ás actividades de AGACA, en relación coas melloras que as cooperativas poderían facer en materia de equidade, destacan a organización de cursos formativos sobre administración empresarial e fiscal ou xerencia, a adaptación de horarios para favorecer a conciliación —un 88% de enquisadas afirmou ocuparse habitualmente sen axuda de persoas maiores e menores de idade no fogar— ou a adopción de acordos con entidades de coidado infantil e de persoas con dependencia.
A este respecto, AGACA promoveu tamén actividades con algunhas cooperativas en temas como o manexo das novas tecnoloxías e as ferramentas TIC e tamén para mellorar a atención a persoas con dependencia sen detrimento do coidador ou coidadora.
