- O consello sectorial lácteo de Cooperativas Agro-alimentarias de España e a Unión de cooperativas agrarias AGACA solicitan que se faga unha reflexión profunda sobre as repercusións en sustentabilidade social e ambiental do proxecto de posta en marcha dunha granxa de 20.000 vacas cunha produción próxima aos 180 millóns de litros en Noviercas (Soria).
A instalación desta granxa supoñería un incremento da produción española en máis dun 2,5%, un cambio moi significativo se temos en conta que os incrementos de produción cinco veces menores (0,5%) de anos anteriores desestabilizaron o mercado e provocaron unha caída importante dos prezos e o peche de granxas.
A máis que presumible volatilidade de prezos, que levará aparellado o incremento da oferta, provocará a desaparición das granxas de menor dimensión, e dun modelo familiar fortemente arraigado e ligado ao territorio. O peche destas granxas irá ineludiblemente ligado a unha diminución das redes sociais e comerciais nas zonas onde se asintan e a perda de centos de postos de traballo.
Doutra banda, é importante facer unha análise sobre o que supoñería aumentar o censo de forma tan significativa no grao de cumprimento de España dos seus compromisos ambientais europeos e mundiais (directiva de Teito de Emisións, Protocolo de Kyoto, Protocolo de Gotemburgo). Os sectores gandeiros están a traballar nunha mitigación das emisións co obxecto de manter a estrutura social e empresarial actual reducindo o seu impacto e favorecendo a súa sustentabilidade. O incremento do censo supoñería un reto aínda maior, quizá inasumible, no cumprimento destes obxectivos que establecen unhas porcentaxes de redución moi estritos.
Ante este panorama, e tendo en conta o interese do Ministerio de Agricultura e Pesca, Alimentación e Medio Ambiente en poñer en marcha unha normativa de ordenación do sector lácteo, o consello sectorial lácteo de Cooperativas Agro-alimentarias de España considera necesario analizar a situación globalmente e de forma sosegada antes de dar luz verde a proxectos desta envergadura que cambiarán de forma significativa o sector lácteo e a estrutura social que o sostén.
A Asociación Galega de Cooperativas Agroalimentarias (AGACA) comparte a postura do consello sectorial lácteo de Cooperativas Agro-alimentarias de España e apioa a necesidade de analizar a fondo a situación, dado o impacto socioeconómico do proxecto, que pode causar graves problemas ao sector.
