- Obra Social “la Caixa” e AGACA puxeron en marcha o pasado venres 13 de xaneiro nas primeiras actividades do “Plan de acción en favor de la infancia, xuventude, muller e maiores 2016- 2017”, con actividades en Ferrol e A Capela
- O Plan inclúe tamén actividades de empoderamento dirixidas á muller cooperativista. A primeira delas neste 2017 terá lugar o mércores día 18 de xaneiro en Cobideza (Cercio – Lalín).
- Preto dun milleiro de persoas se beneficiaron destes programas na campaña 2015/2016.
“Almorz@ con Beizos Brancos” – Ferrol
Cincuenta estudantes do terceiro curso de primaria do CEIP Cruceiro de Canido (Ferrol) participaron na primeira actividade do ano de “Almorz@ con Beizos Brancos”, promovida por AGACA e Obra Social “la Caixa”para fomentar os almorzos saudables.
Unha nutricionista explicou as mellores opcións para almorzar de forma adecuada e dirixiu unha actividade didáctica para mostrar o proceso de produción e transformación do leite. A xornada concluíu cun almorzo baseado en produtos naturais
“Coidar, coidarte” — Cooperativa de Campo Capela
Unha vintena de persoas socias da “Cooperativa de Campo Capela” asistiu á xornada “Coidar, coidarte”, dirixida tanto a persoas maiores, para aprender a envellecer de xeito saudable, como a coidadores e coidadoras, para mellorar a súa calidade de vida e a de quen ten a cargo.
A primeira parte da mañá constou dunha charla sobre o papel das cooperativas na mellora do benestar das persoas maiores do medio rural a cargo de Higinio Mougán, director-xerente de AGACA.
A continuación, Marisol Suárez e Silvia Fondo, profesionais en atención a persoas maiores e con dependencia explicaron diferentes modos de mitigar a deterioración asociada ao envellecemento, a nivel físico, psicolóxico e social, para que tanto as persoas maiores como as que estean encargadas da súa atención gocen dun maior benestar no seu día a día.
Ademais, demostraron, con axuda do público, técnicas para a correcta mobilización e coidado no fogar de persoas maiores ou dependentes.
