AGACA presenta o cooperativismo como opción de futuro laboral para estudantes de Ferrol e Verín
- Estudantes do IES Leixa (Ferrol) e do IES Castro de Baronceli (Verín) participarán mañá en cadanseu Obradoiro de “Emprendemento e Cooperativas. Modelo de éxito”, sobre as particularidades do modelo de negocio cooperativo.
- Está previsto que Covadonga Toca, secretaria xeral de Emprego da Xunta de Galicia, acompañe aos estudantes de Ferrol na visita á sede da cooperativa Feiraco, que terá lugar ás 17:30 h. en Ponte Maceira, s/n – Ames.
Un grupo de estudantes de Ciclo Formativo do IES Leixa (Ferrol) visitará mañá o Centro Rede Eusumo Fundación Feiraco (Ponte Maceira, Ames), mentres que o alumnado do IES Castro de Baronceli (Verín) se desprazará ao Centro de Desenvolvemento Cooperativo Transfronteirizo de Verín (Parque empresarial de Pazos, Verín) para participar nas xornadas formativas.
Técnicos de AGACA (Asociación Galega de Cooperativas Agroalimentarias) explicarán ao alumnado as vantaxes que o cooperativismo ofrece como modelo de negocio estable e rendible no medio rural, co fin de que o teñan en conta como opción de desenvolvemento profesional cando rematen os seus estudos.
Ademais de coñecer casos reais de emprendedores e cooperativistas que consolidaron con éxito negocios no medio rural, os estudantes ferroláns aprenderán de primeira man como funciona unha cooperativa láctea, percorrendo as instalacións de Feiraco, e os de Verín visitarán a adega Cume do Avia, de viño ecolóxico.
Está prevista a presenza de Covadonga Toca, secretaria Xeral de Emprego, na visita que os estudantes do IES Leixa realizarán á cooperativa láctea Feiraco, para mostrar o apoio da Xunta a esta iniciativa de promoción do emprego e o emprendemento baixo o réxime cooperativo, dirixida a estudantes
Rede Eusumo
Durante 2016, máis dunha vintena de centros educativos teñen participado nos Obradoiros de “Emprendemento Cooperativo Eusumo”, promovidos pola Consellería de Economía, Emprego e Industria, a través da Rede Eusumo.
Asesoramento, orientación, formación, acompañamento nas iniciativas empresariais, apoio á internacionalización, celebración de encontros internacionais e transfronteirizos, intercambio comercial e cooperación transversal definen a rede transversal de colaboración Eusumo, nacida en 2011.
