- Esta mañá o Centro da Rede Eusumo “Fundación Feiraco” (Ames) recibiu aos estudantes de Formación Profesional do CIFP As Mercedes (Lugo), que participaron nunha charla e visitaron as instalacións da cooperativa láctea.
- O pasado venres foi o alumnado do Centro de Ensino Padres Mercedarios (Verín) quen tomou parte nunha actividade similar no Centro de Desenvolvemento Cooperativo Transfronteirizo de Verín.
- As actividades enmárcase na Rede Eusumo para o Fomento do Cooperativismo e a Economía Social, impulsada dende a Consellería de Economía, Emprego e Industria.
Un grupo de estudantes dun dos Ciclos Formativos do lucense CIFP As Mercedes tomou parte esta mañá na charla formativa sobre as principais vantaxes que achegan o cooperativismo e a economía social para o desenvolvemento profesional no medio rural, co fin de que o contemplen como opción de futuro laboral unha vez rematen os estudos. Como exemplos de éxito cooperativo, mostrouse aos estudantes unha selección de casos de emprendemento e oportunidades de negocio no medio rural que contan cunha sólida traxectoria empresarial.
Feiraco
Ademais, a través dunha visita ás súas instalacións, os escolares puideron comprobar de primeira man como se organiza o traballo diario da cooperativa Feiraco, dedicada á produción, industrialización e venda do leite galego producido polos seus socios.
Dende o ano 2012 a Fundación Feiraco funciona coma un dos “Centros Rede Eusumo” repartidos por toda Galicia que serven como espazo de dinamización do emprendemento cooperativo.
Centro de Desenvolvemento Cooperativo Transfronteirizo de verín
O pasado venres, 1 de abril, foi o alumnado do Centro de Ensino Padres Mercedarios de Verín, quen participou na actividade da Rede Eusumo. Nesa ocasión, logo da formación teórica recibida no Centro de Desenvolvemento Cooperativo Transfronteirizo de Verín, os mozos e mozas desprazáronse ata as instalacións de Cume do Avia (Ribadavia), cooperativa dedicada á vitivinicultura ecolóxica, para coñecer os pormenores do seu funcionamento.
Seis anos de actividades Rede Eusumo
Asesoramento, orientación, formación, acompañamento nas iniciativas empresariais, apoio á internacionalización, celebración de encontros internacionais e transfronteirizos, intercambio comercial e cooperación transversal definen a rede transversal de colaboración Eusumo, nacida no 2011.
AGACA continúa divulgando o cooperativismo entre alumnado de Secundaria e Ciclos Formativos de toda Galicia mediante charlas con exercicios prácticos e visitas a empresas cooperativas.
