- Estudantes do CPI de Castroverde (Lugo) participarán mañá nun Obradoiro de “Emprendemento Cooperativo Eusumo”, sobre as particularidades do modelo de negocio cooperativo.
- O director xeral de Orientación e Promoción Laboral, Alfonso Marnotes, acompañará aos estudantes na visita á Cooperativa O Val (Vilacornelle, s/n, O Val, Narón) ás 11:30h.
Os estudantes do terceiro ciclo de primaria do CPI de Castroverde (Lugo) visitarán mañá o Centro Rede Eusumo Fundación Terra de Trasancos (O Val, Narón) para participar nunha xornada formativa sobre as particularidades do modelo de negocio cooperativo.
Técnicos de AGACA (Asociación Galega de Cooperativas Agroalimentarias) explicarán ao alumnado as vantaxes que o cooperativismo ofrece como modelo de negocio estable e rendible no medio rural, co fin de que o teñan en conta como opción de desenvolvemento profesional cando rematen os seus estudos.
Ademais de coñecer casos reais de emprendedores e cooperativistas que consolidaron con éxito negocios no medio rural, os estudantes aprenderán de primeira man como funciona unha cooperativa hortícola, percorrendo a Cooperativa O Val.
Alfonso Marnotes, director xeral de Orientación e Promoción Laboral da Consellería de Economía, Emprego e Industria, estará presente na visita que os estudantes realizarán á cooperativa, para mostrar o apoio da Xunta a esta iniciativa de promoción do emprego e o emprendemento baixo o réxime cooperativo, dirixida a estudantes
Rede Eusumo
Durante 2016, unha vintena de centros educativos teñen participado nos Obradoiros de “Emprendemento Cooperativo Eusumo”, promovidos pola Consellería de Economía, Emprego e Industria, a través da Rede Eusumo.
Asesoramento, orientación, formación, acompañamento nas iniciativas empresariais, apoio á internacionalización, celebración de encontros internacionais e transfronteirizos, intercambio comercial e cooperación transversal definen a rede transversal de colaboración Eusumo, nacida en 2011.
