COMUNICADO DE PRENSA
Ángel Villafranca, reelixido presidente de Cooperativas Agro-alimentarias de España
- Cooperativas Agro-alimentarias de España celebrou hoxe en Madrid a súa Asemblea Xeral, na que se reelixiu presidente a Ángel Villafranca, presidente á súa vez de Cooperativas Agro-alimentarias de Castilla La Mancha.
Xunto a el, formarán parte da nova presidencia: Juan Rafael Leal de Cooperativas Agro-alimentarias de Andalucía, como vicepresidente 1º, e Cirilo Arnandis, presidente de Cooperativas Agro-alimentarias de la Comunidad Valenciana como Vicepresidente 2º. O cargo de Secretario ocuparao Jerónima Bonafé, presidenta de Cooperativas Agro-alimentarias Isla Baleares, e o de Vicesecretario será José Montes, presidente da Asociación Galega de Cooperativas Agroalimentarias, AGACA.
A nova presidencia de Cooperativas Agro-alimentarias de España continuará, tal e como destacou Ángel Villafranca, “comprometida coa Organización, o cooperativismo e o sector agroalimentario”.
Ángel Villafranca sinalou que “temos que seguir mellorando a nosa actividade, gañando dimensión e avanzando na cadea de valor, para poder seguir asegurando a permanencia dos agricultores e gandeiros e o desenvolvemento da actividade agrícola e gandeira, que é unha das marcas de identidade do noso modelo, base do equilibrio demográfico e territorial e da sustentabilidade económica, ambiental e social do noso territorio”.
As políticas e os mercados agroalimentarios non paran de cambiar, os competidores son eficientes e os clientes moi esixentes. Por iso, Villafranca manifestou que, “para afrontar os avatares desta contorna, ante a ausencia de medidas de xestión de mercado, é o propio sector en que ten que organizarse e aí é onde as cooperativas deben xogar un papel fundamental. As cooperativas imos ser unha das poucas ferramentas coas que van contar os agricultores e gandeiros neste novo contexto agroalimentario”.
Cooperativas Agro-alimentarias de España representa a 3.838 cooperativas, 1.175.074 socios e 96.220 empregados. As empresas cooperativas rexistraron un aumento do 2% da súa facturación no último ano, pasando de 25.696 a 26.183 millóns de euros, segundo os datos do Observatorio do Cooperativismo Agroalimentario, (OSCAE), correspondentes ao exercicio 2014.
