- As “Xornadas Atrévete Contigo Mesma”, organizadas por AGACA e a Obra Social “la Caixa”, buscan concienciar ás mulleres do contorno rural da súa propia capacidade para participar activamente nos ámbitos empresariais públicos, como as cooperativas.
- A Secretaria Xeral de Igualdade, Susana López, abrirá a primeira Xornada do mes o día 4 nas instalacións de Agris na Louzaneta; o día 6 a Xornada será en Carballo, da man de Coreber e o día 9 terá lugar na Cooperativa Agraria Comarcal de Ordes.
As Xornadas están dirixidas a mulleres que viven no contorno rural, especialmente no caso das vinculadas a algunha cooperativa xa que, en moitos casos, son as titulares das súas explotacións, onde ademais traballan — o 56% delas pasan entre 4 e 8 horas diarias na corte—, pero non exercen cargos nos órganos de decisión.
Nese senso, os datos amosan que, en Galicia, malia que as cooperativas contan cun 49% de asociadas, nos consellos reitores hai un 12% de mulleres e só o 3% de presidentas.
Retos
Entre os retos que se tratarán nas Xornadas, cóntanse os xeitos de conciliar a vida familiar e profesional ou a falta de confianza nas propias capacidades para exercer cargos de responsabilidade pública.
As Xornadas visibilizarán o rol que poden desempeñar as mulleres rurais, motivarán ás asistentes para seren máis participativas e incidirán na necesidade de adquirir conciencia da súa capacidade real para traballar e tomar decisións nos órganos de xestión de entidades do ámbito público.
Compromiso coa igualdade
A iniciativa “Atrévete Contigo Mesma” supón unha continuación das actividades que AGACA vén desempeñando para contribuir á visibilización e o empoderamento das mulleres do contorno rural a nivel persoal e profesional, mediante accións como estudos, enquisas, charlas e módulos formativos e de motivación, que recibiron respostas moi positivas das cooperativas.
“Atrévete Contigo Mesma” suma ademais a implicación da Obra Social “la Caixa”, comprometida coa igualdade de xénero e o aproveitamento da capacidade empresarial das mulleres do mundo rural.
Jornadas en cooperativas
– 4 de novembro, mércores — AGRIS, Polígono da Louzaneta s/n, LUGO – 11:00 a 15:00 h.
– 6 de novembro, venres — COREBER, Restaurante Punta del Este en Avda. de Malpica, 125, Carballo, A Coruña) – 10:30 a 14:00 h.
– 9 de novembro, luns — Cooperativa Agraria Comarcal de Ordes, ACO, r/Emilia Pardo Bazán, 12, Ordes, A Coruña – 10:30 a 14:30 h.
– 18 de novembro, mércores — Campo Capela, Lugar de Calzados, 8 (A Capela), A Coruña – 10:30 a 14:30 h.
– 25 de novembro, mércores — Xallas, Santa Comba, A Coruña – 11:00 a 15:00 h.
– 26 de novembro, xoves — Melisanto, Agüeiros-Furelos (Melide), A Coruña – 10:30 a 14:00 h.
– 2 de decembro, mércores — ICOS, Lugar de Sobreiras – Fornas (Chantada), Lugo – 11:00 a 15:00 h.
