ACTIVIDADES

Maio 2022

REVISTA AGACA

  • Cooperación Galega nº 157 – Marzo 2022

    — Editorial: Venda a perdas.
    — A fondo: Éxito do programa de Apoio á función xerencial entre cooperativas e estudantes en prácticas.
    — Caderno Técnico: Os consellos dos expertos ante as subas de enerxía e materias primas nos custos de produción das explotacións leiteiras.

    Ver Online Ver Todas Hemeroteca

A familia de Lidia dedícase ao vacún de carne, un subsector que, a raíz da crise sanitaria actual, está  pasando por dificultades xa que a hostalería era o mercado preferente para esta carne. Aínda así, Lidia é optimista e pensa que hai futuro no sector. A día de hoxe, compaxina o traballo nunha farmacia co que desenvolve na granxa familiar á que espera incorporarse a medio prazo.

Dende nena viviu cos animais e son a súa vida. A explotación familiar, en Guitiriz, conta con 40 cabezas de gando e un cebadeiro con 180-200 animais por ano. Gustaríalle ampliar o cebadeiro ata chegar a 1000 cabezas e probar a introducirse tamén na apicultura, aínda que como un complemento. De momento, recoñece que non sería viable incorporarse a explotación familiar e dedicarse en exclusiva á actividade gandeira: “Son momentos moi malos para o vacún de carne, pola pandemia”, pero asegura que ese momento chegará..

Como ocorre en máis casos, a pesar de ter claro que a súa profesión ía ser a gandeira deixouse aconsellar e desprazouse á Coruña para estudar un Ciclo de Farmacia e Parafarmacia despois do que decidiu estudar o Ciclo Superior de Gandería e Asistencia en Sanidade Animal. Actualmente combina ambas profesións e iso permítelle vivir de xeito independente, aínda que moi preto da familia, xa que é un piar imprescindible na súa vida.

Un dos aspectos que máis valora de traballar no rural é a conciliación familiar e poder estar cerca de familia. Conta, como anécdota que sempre recorda como, de nena, tras ser diagnosticada como diabética, a súa nai ía todas as mañás ao colexio para ver que se inxectaba ben a insulina. Ese detalle fíxolle ver a gran vantaxe que supón traballar para un mesmo e poder adaptar os horarios para atender as necesidades familiares. Lidia asegura, ademais, que traballar xuntos une moito á familia.

“Eu vexo máis doado emprender aquí, no campo, que montar un tenda. Se isto che gusta, hai moitas posibilidades”

Con 23 anos, esta moza está plenamente convencida das posibilidades de desenvolvemento profesional que ofrece o ámbito rural, sobre todo se estás motivado: “Eu vexo máis doado emprender aquí que montar un tenda. Se isto che gusta, hai moitas posibilidades porque ademais, os que nos quedamos é porque o queremos de verdade”.

“A Administración pediríalle que puxera os pés na terra”

Por outra banda, á Administración pediríalle que “poña os pés na terra” porque, segundo sinala, as medidas que acomete non se adaptan a realidade galega e pon como exemplo o caso do lobo, cuxa caza pretende prohibirse “a pesar dos grandes problemas que está provocando cos ataques ao gando en Galicia” .